កែប៖ ក្រោយពីមានការរិះគន់ កុងត្រូលរបស់ក្រុមវិនិយោគរបស់ខេត្តកែប ត្រូវបានដកចេញវិញហើយ បន្ទាប់ពីមានបទបញ្ជាពីនាយករដ្ឋមន្ត្រីកម្ពុជា សម្តេចតេជោ ហ៊ុន សែន នាព្រឹកថ្ងៃទី១៥ ខែមេសា ឆ្នាំ២០២៣។

រដ្ឋបាលខេត្តកែប បានសរសេរនៅក្នុងទំព័រហ្វេសប៊ុកផេកដូច្នេះថា៖ «កុងត្រូលរបស់ក្រុមវិនិយោគត្រូវដកចេញក្រោយបទបញ្ជារបស់ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប»។

សម្តេចតេជោ បានប្រតិកម្មចំពោះចំណាត់ការរបស់រដ្ឋបាលខេត្តដែលទារភាស៊ីពីភ្ញៀវទេសចរដែលចូលមកលេងខេត្តកែប បន្ទាប់ពីម្ចាស់គណនីហ្វេសប៊ុកឈ្មោះ Samnang Nov បានបង្ហោះការមិនពេញចិត្តចំពោះបញ្ហានេះ។

តែយ៉ាងណា បញ្ហានេះត្រូវបានបញ្ចប់ ក្រោយពីមានបទបញ្ជាពីនាយករដ្ឋមន្ត្រីឱ្យអភិបាលខេត្តកែបបញ្ចប់ការទារភាស៊ីផ្សេងៗពីភ្ញៀវទេសចរ ដោយសម្តេចសង្កត់ធ្ងន់ថា ការទារភាស៊ីពីភ្ញៀវទេសចរវាមិនចំណេញដល់ខេត្តនោះទេ គឺមានតែផ្តល់បញ្ហាដល់ខេត្តទៅវិញទេ។

សម្តេចថ្លែងថា៖ «បើសិនជាលោកឯងយកប្រជាជនទៅលេង នៅកន្លែងនោះ (ខេត្តកែប) លោកឯងនឹងចំណេញច្រើនជាង»៕